MOMENTUM #IWD2018:

SUKU MANUMERA – TURISCAI SAI FATIN KONSENTRASAUN ALOLA BA SELEBRASAUN LORON FETO MUNDIAL 2018

Iha loron 14 Marsu 2018, Ekipa programa Fundasaun Alola hakat ba Postu Administrativu Turiscai organiza atividade selebrasaun Loron Internasional ba Feto hamutuk ho inan feto sira iha ne’eba. Atividade ne’e rasik konsentra iha Suku Manumera, nu’udar suku alvu ida ne’ebe durante ne’e hetan benifisiu husi programa Alola, liu-liu programa Edukasaun.

Seremonia Loron Internasional ba Feto ne’ebe organiza iha Suku Manumera sei halao kompleta atividade lubuk ida ne’ebe ekipa Alola organiza. Atividade ne’ebe foti lema nasional “Tempo To’o Ona-Mai Ita Promove No Tane As Liman Badaen Feto Timor-Leste” hanesan dalan ida hodi habelar liu-tan informasaun kona-ba progresu feto nia ne’ebe iha ba inan feto sira iha fatin rural sira.

Diretora Ezekutiva Alola, Alzira Reis photo hamutuk ho feto forte iha Turiscai

“Iha loron ida ne’e mundu rekonese ita nia luta no ita mos tenke rekonese rasik luta nasional ne’ebe ita nia feto maluk sira halo tanba ne’e ita hamutuk iha ne’e alende ita kontente , ita mos hanoin fila-fali hodi halo refleksaun katak loron ida ne’e signifika saida ba hau hanesan feto ida”, esplika Diretora Fundasaun Alola, Alzira Reis durante introduz programa.

Atividade ne’ebe realiza liu husi apoio SEIGIS no IWDA halibur parte oin-oin hahu husi estudante, feto iha komunidade, jovens fteo, asosiasaun feto, chefe suku, reprezentante asosiasaun feto Manufahi, ofisial suku PNTL no autoridade lokal. Atividade ne’e rasik ofisialmente loke husi Administrador do Posto Turiscai, Julio Gonindo ho lia agradesementu ba inisiativa husi Fundasaun Alola atu bele hakat ba Suku Manumera, selebra hamutuk komunidade refere.

“Atividade ida ne’e mos sai matadalan, sai hanesan bukae ida atu bele loke ita nia hanoin, fo motivasaun ba ita oinsa para bele prepara ita nia oan didiak hodi bele fo kontribuisaun buta ruma ba paz no estabilidade no dezenvolvimentu rai ida ne’e” hatete Administrador do Posto ne’e bainhira halao abertura iha Sede Suku Manumera – Turiscai.

Administrador do Posto Turiscai, Julio Gonindo fo lia-menon

Atividade komemorasaun ne’ebe halao hanesan atividade ba dala uluk organiza iha Suku Manumera no sei fo motivasaun ba inan feto sira atu bele iha koragem nafatin, kontinua feto luta nain sira liu-liu fo kontribuisaun ba dezenvolvimentu. Natercia Simoes, Vice Assosiasaun Feto Posto Administrativu Turiscai iha ninia lia menon haktuir katak oppurtunidade ne’ebe Fundasaun Alola liu husi atividade komemorasaun sei fo benifisiu direta ba inan feto nia hanoin tanba bele hetan informasaun diak kona-ba feto nia moris no feto nia luta.

“Nu’udar feto hau hakarak husu feto maluk sira nomos alin sira atu partisipa ativu nune’e ita bele aproveita buat ruma, ita bele aprende buat ruma oinsa ita bele muda ita nia an, bele muda ita nia oan sira”, hateten Vice Assosiasaun feto ne’e.

Durante atividade ne’ebe konsentra iha Sede Suku Manumera, ekipa Fundasaun Alola mos introduz plano programa ne’ebe sei realiza iha futuru ne’ebe bolu “Aprosimasaun Intergradu”.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s