RESPONDE BA DEZIGUALIDADE, ALOLA ADOPTA APROSIMASAUN PROGRAMA INTEGRADU

Suku Caimauk no Suku Manumera, Sai Suku Pilotu

Iha Kuarta Feira (17/10) tinan 2018, Fundasaun Alola lansa ofisialmente projetu foun ho naran Aprosimasaun Programa Integradu (API). Seremonia lansamentu ne’ebe realiza iha salaun administrasaun Turiscai – Munisipiu Manufahi sai hanesan momentum importante ida husi komitmentu Fundasaun Alola hodi lori mudansa signifikante ba situasaun moris feto no labarik sira liu-liu iha area rurais. Liu husi projetu ne’e, rekursu programa 4 ne’ebe Fundasaun Alola iha sei fo konsentrasaun hodi dezenvolve area alvu ida. Ba etapa primeiru, projetu ne’e konsentra iha suku hamutuk 2 iha Postu Administrativu Turiscai mak Suku Caimauk no Suku Manumera.

Inisiativa Fundasaun Alola hodi estabelese projetu API deklara iha Selebrasaun Loron Feto Mundial, 8 Marsu 2018 husi Diretora Ezekutiva Alzira Reis iha Sede Suku Manumera. Liu husi deklarasaun ida e’e, Fundasaun Alola hakarak konkritiza ninia komitmentu ne’ebe durante tinan 17 nia laran ezersa ninia misaun sira atu bele responde ba dezigualidade ne’ebe feto no labarik esperensia iha Timor-Leste.

“Servisu hirak ne’e hanorin ami atu kontinua tau esforsu integradu hodi hatan ba nesesidade no bareira ne’ebe feto no labarik hasoru iha setor saude, edukasaun, ekonomia no partisipasaun iha lideransa hodi foti desizaun iha nivel tomak”, hateten Diretora Alzira Reis.


Hahu husi hanoin ida ne’e Fundasaun Alola deside atu halo projetu pilotu hanaran aprosimasaun integradu iha Suku Kaimauc no Manumera ho objetivu prinsipal mak atu melhorar estatutu nutrisaun ba labarik. Preparasaun naruk Alola halao antes tama ba prosesu lansamentu hanesan kolekta dadus baziku, konsultasaun ho lideransa iha nivel munisipiu, sosializasaun, diskusaun grupu iha nivel postu administrative no ikus preparasaun ba estabelesementu Suku Hadomi Inan ho Oan (SHIO).

“Hau iha esperansa boot katak ho etapa hirak ne’ebe liu ona bele konvense itaboot sira atu ita tau liman hamutuk ba alkansa objetivu ida ne’ebe fo benefisiu ba ita nia Inan no oan sira iha suku rua refere’, lia-menon ida husi Diretora Alola ba lansamentu projetu ne’e.

Diretora ne’e mos reforsa tan katak lansamentu inisitaivu ida ne’e nu’udar pasu inisiu ne’ebe ijiji partisipante ne’ebe marka prezensa iha seremonia refere hodi tau esforsu no komitmentu hahu loron lansamentu too tinan 2 ka 3 mai ba mudansa moris saudavel feto no labarik nian iha suku rua refere.



Lansamentu ba premeiru etapa ne’e simbolikamente halo ho inagurasaun grupu Suku Hadomi Inan no Oan (SHIO) ne’ebe estabelese iha Suku Caimauk no Manumera. Membru vountario grupu SHIO husi suku 2 ne’e hato’o deklarasaun komprimisiu iha autoridade lokal no komunidade nia oin hodi hasae direitu no dignidade inan feto no labarik sira iha sira nia suku.

Administrador do Postu Turiscai, Sr. Julio Godinho durante sesaun abertura durante lansamentu ne’e hato’o ninia apresiasaun ba Fundasaun Alola tanba bele realiza duni ninia komitmentu hodi implementa aprosimasaun integradu.

“Nu’udar Turiscai oan Ami orgulhu tanba programa sira ne’e bele halao iha Postu Administrativu Turiscai hanesan pasu ida oinsá bele haree ba dezenvolvimentu Turiscai nian liu-liu ba iha Suku Caimauk no Suku Manumera”, hateten administrador ne’e iha Salaun Administador do Posto Turiscai.

Entertantu, Jerente Alola ba programa Saude Inan no Oan, Maria Guterres durante seremonia ne’e informa katak projetu SHIO ne’ebe Alola estabelese iha Postu Administrativu Turiscai diferensa ho projetu SHIO iha munisípiu sira seluk tanba grupu SHIO rua ne’ebe inagura ona iha Suku Caimauk no Suku Manumera hanesan parte ida husi inisiativa aprosimasaun programa integradu.

“Baibain, bainhira Alola estabelese grupu SHIO ida, ne’e hanesan parte ida husi programa Saude Inan no Oan deit, maibe agora lae tanba ita hatama tan programa sira seluk ne’ebe iha Fundasaun Alola nia okos hanesan programa edukasaun, ekonomia no advokasia”, Jerente Alola ne’e esplika.


Maria Guterres haktuir mos katak grupu SHIO refere iha papel boot ida atu tau atensaun laos deit ba aspeitu saúde nian deit maibe ba aspeitu seluk hanesan edukasaun, ekonomia no advokasia hodi fo apoio komunidade sira liu-liu ba inan no labarik sira.

“Hau hato’o ba membru SHIO foun sira no benvindo ba Fundasaun Alola tanba ita boot sira sai ona parseiru husi Alola nian hodi hamutuk suporta ita nia feto no labarik sira iha suku 2 refere”, hateten Jerente Alola ba programa Saude Inan no Oan nian.

Seremonia ne’ebe realiza iha Salaun Postu Administrativu Turiscai hetan partisipasaun masimu husi Admnistrador do Postu, Xefe Serbisu Saude Turiscai, Inspectur Edukasaun, Komadante PNTL Eskuarda Turiscai, lideransa lokal sira, konselhu suku, joventude, feto potensial, membru grupu SHIO Caimauk no Manumera nomos komunidade.

Julio Godinho, nu’udar reprezentante governo nian, durante lansamentu ne’e mos fo koragem ba membru grupu SHIO husi suku 2 ne’e atu bele sai motivador iha komunidade nia laran hodi bele hadia sira nia moris.

“Ita boot sira hanesan ema motivador no influensador, oinsá atu bele motiva no influensia ita nia inan aman sira atu bele hadia diak liu-tan kualidade moris liu-liu iha area nutrisaun labarik sira”, haktuir Administrador do Postu Turiscai.


Dadus hatudu katak 70 pursentu husi populasaun Timor-Leste moris iha area rural no 35 pursentu mak feto tamba ne’e persija tebes kolaborasaun ema hotu nian atu kontinua haforsa setor importante sira hanesan melhorar saude inan ho oan, fornese oportunidade asesu ba eskola no hadia kualidade edukasaun no proteje labarik sira husi violensia oin-oin ne’ebe trava sira nia kresimentu no dezenvolvementu.

“Ami presiza nafatin tulun atu nune’e bele hafanun ami feto ne’ebe hela iha area rural atu bele hatutan ba maluk sira ne’ebe la bele partisipa iha selebrasaun ida ne’e”, rekomendasaun ida husi Sra. Isabel de Jesus, Chefe Suku Manumera iha selebrasaun ne’e.

#remata

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s