“FETO TENKE FIAR AN RASIK TANTU IHA FAMILIA NOMOS SOSIEDADE”

Lia-menon husi Espoza Prezidente Repúblika, Cidalia Lopes Nobre Mouzinho Guterres durante komemorasaun Loron mundiál ba Feto ha Munisipiu Ermera.

“Ohin loron, feto nia presenza ba ukun rasik an ida ne’e importante teb-tebes, uluk feto hamrik iha mane nia sorin hodi hamutuk luta ba ukun rasik an no agora mos feto sei hamutuk nafatin ho mane hodi halao dezenvolvimentu tuir méritu ida-idak ne’ebe feto iha”, Cidalia Lopes Nobre Mouzinho Guterres, Espoza Prezidente Repúblika hateten iha Salaun Paróquia Gleno – Ermera.

Photo : Alolamedia@2019/Fransiskus.XS

Loron 8 fulan-Marsu sai hanesan loron kmanek ba feto Timor-Leste tanba iha loron ida ne’e, entidade ou instituisaun oin-oin organiza an atu bele kria atividade hodi selebra Loron Mundiál ba Feto. Ho lema nasionál “ Hanoin Hanesan, Hari’i ho Matenek no Halo Inovasaun ba Mudansa”, selebrasaun Loron Mundiál ba Feto 2019 sai loron espesiál ba feto hotu-hotu laos deit komemora husi instituisaun relevante ho asuntu feto nian deit maibe komemora husi feto hotu tuir kbi’it ne’ebe sira iha. Feto Timor sai ona nain ba selebrasaun ida ne’e, nu’udar momentum importante ida ba sira hodi selebra sira nia progresu no atinjimentu ne’ebe sira hetan.

Sekretária Estadu ba Igualdade no Inkluzaun, S.Exa. Sra. Maria José da Fonseca Monteiro de Jesus durante nia deskursu ba selebrasaun Loron Mundiál ba Feto 2019 hateten katak governu iha kompromisu a’as atu atinji mehi ba sosiedade ida ne’ebé justu no hanesan. Iha tempo hanesan mos nia reforsa katak governo kontinua nafatin halo esforsu hotu atu kria kondisaun ne’ebé fó protesaun no seguransa ba Timor-Oan feto, mane, ema vulneravel no ema sira iha risku.

Komemorasaun Loron Mundiál ba Feto sai tempo atu feto hotu bele halo refleksaun ida kona-ba progresu ne’ebe atinji ona hodi promove no proteje igualdade no direitu umanu hanesan rezultadu ida husi Konferensia Feto Mundial ba Dala Hat ne’ebe halo iha Beijing. Tinan 20 resin ona, Deklarasaun Beijing no Plataforma Asaun implementa ona maibe kuaze um kuartu sentenáriu hafoin nasaun sira asina plaka deklarasaun ne’e feto sira sei enfrenta problema oin-oin.

“Ita liu ona dalan naruk desde tinan 1995, Deklarasaun Beijing no Plataforma Asaun-no tempo ona atu selebra feto sira nian atinjimentu, maibe mos tempo ona atu sukat oinsá feto sira nia direitu preenxidu iha mundu liu-liu direitu ba saúde”, hateten Dr. Rajesh Pandav, reprezentante OMS iha Timor-Leste.

Tinan 20 depois maioria povo Timor-Leste desidi ukun rasik an, ita hetan mudansa positivu barak iha ita nia rai maski nune’e ita nia sosiedade liu-liu ita nia feto maluk sira nafatin hasoru disigualdade iha sira nia moris loron-loron.

“Ita-nia maluk feto barak sei hela iha kondisaun mukit tebes no seidauk goza oportunidade atu kontribui ba prosesu dezenvolvimentu nasionál tanba razaun oin-oin, inklui la remata eskola, isin-rua sedu, laiha kbiit ekonómiku, abuzu seksuál, violénsia bazeia ba jéneru no seluk tan’, hanoin ida husi Fundadora Alola, Sra, Kirsty Sword Gusmao ba Loron Internasional Feto nian

Loron mundiál ba Feto sai hanesan loron ida atu rekoñese feto nia direitu, kontribuisaun ba dezenvolve nasaun no luta hapara diskriminasaun no violasaun oin-oin hasoru feto hahu kedas husi uma laran to’o sosiedade. Lia- fuan hirak ne’e hato’o husi Espoza Prezidente Repúblika Cidalia Lopes Nobre Mouzinho Guterres durante komemorasaun Loron Mundial ba Feto iha Suku Fatukero, Munisipiu Ermera.

“Ohin loron, feto nia presenza ba ukun rasik an ida ne’e importante teb-tebes, uluk feto hamrik iha mane nia sorin hodi hamutuk luta ba ukun rasik an no agora mos feto sei hamutuk nafatin ho mane hodi halao dezenvolvimentu tuir méritu ida-idak ne’ebe feto iha”, Cidalia Lopes Nobre Mouzinho Guterres, Espoza Prezidente Repúblika hateten iha Salaun Paróquia Gleno – Ermera.

Liu husi oportunidade ne’e, espoza Prezidente do Republika hanesan inan hanesan feto mos hato’o parabens no hakuak bo’ot ba feto hotu-hotu iha mundu, espesialmente ba feto no feto foinsa’e Timor-Leste, husi lorosae to’o loromonu, husi sidade to’o area rural sira. Hanesan Inan Nasaun nian, espoza Prezidente do Republika ne’e lahaluha fo koragem ba feto sira.

“Feto tenke respeita ita nia an rasik, ita tenke kuidadu ita nia an rasik, ita mos tenke prepara ita nia an rasik, ita mos tenke brani koalia sai ita nia hanoin, no feto tenke fiar an rasik tantu iha familia nomos sosiedade”, haktuir espoza ne’e.

Komemorasaun ne’ebe organiza husi Asosiasaun Feto Munisipiu Ermera haforsa tan divulgasaun informasaun ba eventu mundiál ne’e, fahe haksolok ba feto iha Ermera hamutuk ho feto forte sira iha Asosiasaun Família Militár (AFAMA), membru Parlamentu Nasionál, membru Governu, lideransa organizasaun juventude nomos sosiedade sivíl. Komemorasau n ne’e rasik fahe iha atividade tolu hanesan vizita inan feton sira iha estabelesimentu prizional Gleno; fahe informasaun kona-ba feto ho saúde ambientál, ekonomia no agrikultura sustentavel ; no atividade ikus mak kuda ai-oan no inagura mini merkadu iha Suku Fatukero.

Antes ne’e, iha Kinta-feira (7/3), Governo RDTL liu husi Sekretária Estadu ba Igualdade no Inkluzaun (SEII) no Ministerio Negósius Estranjeirus no Kooperasaun (MNEC) komemora loron importante ne’e iha Munisipiu Liquica ho lema “Hanoin Hanesan, hari’i ho Matenek no halo Inovasaun ba Mudansa”. Eventu ida ne’e hetan partisipasaun husi membru GMPTL, diplomata sira nomos governo lokal.

Fundasaun Alola hanesan sosiedade sivíl liu husi ninia reprezentante Maria Guterres sente orgulhu tebes bele fahe informasaun kona-ba moras kankru feto nian durante selebrasaun Loron Mundial ba Feto ne’ebe Ministeriu Saude organiza . Jerente Alola ba programa Saude Inan no Oan ne’e haree katak importante tebes atu bele halo koordenasaun iha parte hotu liu-liu husi parte organizasaun sivíl, Ministeriu da saúde no ita nia fasilidade saúde sira atu halo edukasaun ba ita nia komunidade sira kona-ba sinal-sinal sira husi kankru ninian ka risku sira ne’ebe kontribui ba hamosu moras kankru nian.

“Hanesan sosiedade sivíl, ami esforsu maka’as atu halao edukasaun ba iha komunidade sira hanesan sensibilizasaun informasaun kankru feto sira ne’e ba too iha nivel baziku, eduka inan aman no jovens sira liu-liu ba feto sira, agradese ba Ministeriu Saude bele fo oportunidade ba ami hodi fahe informasaun sira ne’e durante komemorasaun Loron Mundial ba Feto”, reforsa Jerente Alola ba programa Saude Inan no Oan ne’e.

This slideshow requires JavaScript.

Fundasaun Alola hanesan organizasaun sosiedade sivíl liu husi programa advokasia organiza selebrasaun ida hamutuk ho feto poténsia husi Suku Manutasi-Munisipiu Ainaro. Ekipa programa Saude – Alola mos hetan konfiansa atu sai orador iha selebrasaun ne’ebe organiza husi Ministeriu Saude hodi fahe informasaun kona-ba moras kankru feto nian. Partisipa iha komunikadu imprensa hamutuk ho membru Rede Feto sira seluk mos sai atividade ida hodi bolu atensaun públiku ba feto nia interese.

#remata

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s